Published on She.com/SheMom on 15/02/2022
近日疫情又再肆虐，令大家憂心忡忡，尤其家長更加心慌慌。點解？因為Zoom嘅季節又嚟喇！近期好多家長都問我：「Miss Tiffany，小朋友上Zoom好難專注坐定定，點算好？」唔駛驚，Miss Tiffany喺大廳！等我分享幾個錦囊畀大家啦！
在家專心上網課錦囊 1：給孩子適當的學習環境
小朋友書枱是否有好多嘢？例如圖書、五支筆、兩個擦子膠、玩具、工作紙統統放晒喺枱面？如果小朋友本身專注力已經較弱，面前仲有好似百貨公司咁多嘢喺度，只會令佢哋更加眼花撩亂，手仔更會搞東搞西，更難專注上課。
因此最好嘅環境設定，係枱面只有需要嘅嘢：例如一枝筆、一個擦膠、一張工作紙就夠喇！如果上堂基本係只需要望住個電腦螢幕，我哋其實連筆都可以收埋，等有需要時先攞出嚟用。
另外，亦要留意小朋友坐嘅位置，最好唔好望住太多嘢，身邊亦唔好有人不停行嚟行去。記住要盡量減少令佢分心嘅人與事物。
在家專心上網課錦囊 2：課堂規矩
唔好以為學校先有規矩，喺屋企上網課都要有規矩！爸爸媽媽同小朋友上網課前，記得用啲時間去同小朋友講明：上堂有乜規矩要遵守，等佢哋知道，上堂老師對佢哋會有啲乜嘢期望。例如：要坐定定、眼睛望住老師、答問題前要舉手等等。講嘅行為要具體，淨係講「聽話」係唔足夠㗎 ！
家長可以將上堂規矩貼在牆上以提醒小朋友。
在家專心上網課錦囊 3：專注力與感官需求
其實專注力同感官需求係有連繫。若果 小朋友的感官需求未被滿足，有可能影響其專注力。而我哋可以善用工具去幫助小朋友滿足感官需求，例如可以用「感統坐墊」（Wiggle seat) 或者一啲「療癒工具」(Fidget toys) 去給予適當感官刺激，從而幫助提升專注力。
「感統坐墊」（Wiggle seat) 可給予小朋友適當感官刺激，有助提升專注力。
另一種Fidget Toys Fidget Spinner，可滿足小朋友的感官需求。
Stretch Ball 也是Fidget Toys一種。
令小朋友着迷的Popit也是Fidget Toys的一種。
在家上專心網課錦囊 4：視覺時間表
要知道對於精力充沛嘅小朋友嚟講，要適應虛擬的校園生活，淨係對住電腦螢幕上堂，其實都係一件辛苦嘅事。我哋可以將上堂嘅時間表視覺化，並放於當眼的位置，咁就可以畀到更多的心理準備小朋友，所有上課嘅流程都一目了然。
我哋甚至可以將「遊戲時間」放喺時間表最後，咁就更能夠推動到佢哋去跟從時間表，完成當日課堂。因為佢哋已知道原來要上晒啲堂，先可以去玩玩具！
在家專心上網課錦囊 5：善用獎勵系統
要有效地提升孩子的良好行為，家長可以利用獎勵系統去推動孩子學習。先清楚訂明目標行為，同時亦要畀孩子清晰知道，做好咗乜嘢行為就能得到獎勵及稱讚，而儲夠某個數目嘅星星就可以換領獎勵。
小竅門：做對行為一分鐘內畀獎勵先最有效！
其實，要有效利用獎勵系統去提升良好行為，仲有好多竅門，唔係坊間講得咁簡單。例如你哋又知唔知，獎勵要點畀先有用？據科學研究指出，喺目標行為發生後0至60秒內畀獎勵，先能最有效提升良好行為的發生！
我哋只要掌握埋其他科學實證嘅教學重點，就可以運籌帷幄，真正能夠善用獎勵系統去幫助小朋友學習。下次有機會再詳細教大家點樣運用！
希望以上幾個錦囊幫到大家。祝各位身體健康，出入平安！
請注意：每個小朋友的能力及情況都不盡相同。如有個別行為問題，請諮詢專業的國際認證行為分析師（BCBA)。
國際認證行為分析師、心理學碩士 - Miss Tiffany
- 兒童行為發展專家 - 𝐁𝐨𝐚𝐫𝐝 𝐂𝐞𝐫𝐭𝐢𝐟𝐢𝐞𝐝 𝐁𝐞𝐡𝐚𝐯𝐢𝐨𝐫 𝐀𝐧𝐚𝐥𝐲𝐬𝐭 (𝐁𝐂𝐁𝐀) - 𝐀𝐁𝐀一對一行為治療 | 社交小組課程 | 學校影子老師 | 家長培訓服務 | 特殊教育 -《兒童正向行為教學：視覺導航教具書》 - 分享正確及具科學實證有效育兒教學方法 ｜相信科學，相信專業 ｜
Comments